Силсилафилми «Полиси ҷавон» аз имрӯз, 27-уми майи соли 2026, ҳар рӯз аз шабакаи АйФилм2 пахш мешавад; асаре ҷиноӣ-иҷтимоӣ, ки дар канори пайгирии парвандаҳои печида, достони ҷустуҷӯи як ҷавонро барои расидан ба ҳақиқат ривоят мекунад.
Ин силсилафилм ба коргардонии Сирус Муқаддам аз ҷумлаи осори шинохташуда дар жанри полисӣ мебошад, ки бо омезиши фазои муаммоӣ, муносибатҳои хонаводагӣ ва драмаи инсонӣ, ривояти фарқкунандаеро ба бинанда пешниҳод мекунад. Бар хилофи бисёре аз осори ҷиноӣ, ки танҳо бар кашфи ҷиноят тамаркуз доранд, «Полиси ҷавон» талош мекунад дар канори моҷароҳои амниятӣ, ҷаҳони дарунии қаҳрамонҳои худро низ ба тасвир кашад.
Достон перомуни «Юнус» шакл мегирад; ҷавоне, ки зиндагияш пас аз як ҳодисаи талх, масири тозае пайдо мекунад. Падари ӯ, ки қозӣ будааст, дар як рӯйдоди машкук ҷони худро аз даст медиҳад; ҳодисае, ки саволҳои зиёди беҷавобро дар зеҳни Юнус боқӣ мегузорад. Ин воқеа танҳо як фоҷиаи хонаводагӣ нест, балки ба муаммое табдил мешавад, ки солҳо фикри ӯро машғул месозад.
Пас аз барҳам хӯрдани маросими никоҳи ӯ бо «Нилуфар» ва бо пешниҳоди модараш, Юнус вориди донишкадаи полис мешавад. Қароре, ки дар оғоз тағйири оддие дар зиндагии ӯ ба назар мерасад, аммо тадриҷан ба бахше аз роҳи кашфи ҳақиқат табдил меёбад. Ӯ баъд аз оғози кор дар бахши ҷиноӣ, бо парвандаҳое рӯбарӯ мешавад, ки ҳар кадом танҳо як вазифаи рӯзмарра нестанд; балки гоҳе нишонаҳое аз гузашта ва посухҳое барои саволҳои шахсии ӯро дар худ доранд.
Яке аз нуктаҳои барҷастаи силсилафилм, ҳаракати ҳамзамони ду хатти достонӣ аст; аз як сӯ парвандаҳои ҷиноӣ ва талош барои ёфтани ҷинояткорон, ва аз сӯи дигар, ҷустуҷӯи шахсии Юнус барои равшан шудани рози марги падараш. Ҳамин сохтор боис шудааст, ки ривоят танҳо ба таъқиб ва таҳқиқ маҳдуд намонад ва ҷанбаи эҳсосӣ ва инсонӣ низ пайдо кунад.
Дар ин силсилафилм, Шаҳоб Ҳусайнӣ дар нақши «Юнус» дар канори ҳунармандоне чун Дориюш Арҷманд, Парвона Маъсумӣ, Мерило Зореъӣ, Митро Ҳаҷҷор, Фарҳод Аслонӣ, Муҳаммадризо Довуднажод ва Фарҳод Башоратӣ ҳузур доранд. Омезиши ин ҳунармандон ба достон фазои боварпазир ва таъсиргузор бахшидааст.
Барои бинандагони Афғонистон ва Тоҷикистон, «Полиси ҷавон» метавонад фаротар аз як достони ҷиноӣ бошад; ривояте дар бораи ҳақиқат, адолат ва саволҳое, ки гоҳе солҳо дар зеҳни инсон боқӣ мемонанд.
Дар поён бояд ёдовар шуд, ки силсилафилми «Полиси ҷавон» аз имрӯз ҳар рӯз соати 17:00 ба вақти Теҳрон, 18:00 ба вақти Кобул ва 18:30 ба вақти Душанбеи Тоҷикистон аз шабакаи АйФилм2 пахш мешавад.
